婚姻前奏曲(原文：結婚喎！) - 谷德昭

以下文章摘自 PENTHOUSE November 98 No.156 之膽固醇集
* * * * * * * * * * * * * * * * * * * * * * * * * * * * *

有人問點解要結婚？
結婚是否需要理由，見仁見智，明查暗訪之下，搜集到幾個結婚的理由，如下：

<<結婚喎，結囉！>>
在這個理由之下，結婚彷彿成為一種節目，男女雙方拍拖拍到悶，冇乜地方好去，玩到冇乜好玩，往往在一個毫不浪漫的環境之中、毫無心理準備之下，男與女四目交投，講到冇乜好講，求祈一方會突然說出：“結婚喎，好冇？”，另一方通常會回答：“結囉！”；這一類型的結合，離婚的機會頗高；然而，既然結婚不過是一個節目，大家亦不會太介意。

<<怕寂寞兼嫌命長>>
“老來要有個伴”這一句，幾乎成為金科玉律；現今科學昌明，人類壽命一再延長，有人恐怕晚年時舉目無親，於是四出搜查異性知己，期望能共度餘生。這一類型的感情，往往天長地久，但切記在結婚前，男女雙方均要做足身體檢查，否則，新婚期間是但一個瓜老襯，就認真得啖笑。

<<朋友結晒婚>>
曾經發過一個惡夢，電話簿內所有朋友全部結晒婚，打爛電話都搵唔到人陪玩，登時被嚇醒，出了一身冷汗。雖然只是惡夢一個，但現實絕對有可能發生，如見身邊單身好友逐漸減少，宜立即快馬加鞭加入結婚行列，免至成為最後一個過年過節見到朋友全部快樂家庭，自己孤伶伶，確實係慘。

<<好累>>
好累，所以想結婚；好累，唔想再在茫茫人海中再找尋；好累，好想 settle down。放心！結婚之後只會更累，如果唔累的話，結唔結婚都唔會累，晤關結婚事。

<<想生細路>>
細路生出來得唔得意，將會係最關鍵，男性對小朋友熱情好快就過，如果唔得意好難 keep 得長！切記，細路仔唔聰明，細路女唔靚，十居其九，打定輸數，到時個心會冇咁[囈]。

<<想買樓，不如結婚>>
有人因為結婚所以買樓，但香港市民悲哀之處係，竟然有為數不少的人，係因為“想買樓，不如結婚。”；自此以後，公一份、婆一份，百分之八十人工俾層樓，冇街去、冇戲睇、冇埠遊、冇“ping”shop；兩公婆日日坐在層樓牛衣對泣，諗落真係黐黐地線。

<<好奇>>
因為好奇而結婚，多數都係落得一個後悔。不過冇乜所謂，因為未結過婚會後悔自己未結過婚，結了婚會後悔點解結婚，殊途同歸，冇乜所謂。

<<真愛>>
傳說中因為真愛而結婚，恭喜、恭喜、恭喜……